Tungnungpen ah Pathian thupi henla, ama’ angvan leitung mihingte lak ah, lemna leng hen! a chi uhi.
(Luk 2:14BI).

THUPATNA

Amasa in, Pathian Pomtak Biakpiakna i piak leh neih theihna ding in, Lungtang ah lemna i neih poimoh mahmahte lak a khat ahi. I Toupa Jesu hong pianna toh kisai a, lemna kigen in: i) Pathian leh mihingte kal ah kilemna; ii) mihing leh mihingte kal kilemna gen thei hi. I Laisiangthou in, “Lemna bawlte a hampha uh; Pathian’ tate chih ding ahingal ua” chi hi (Mat 5:9BSI). Huaiziak in Laisiangthou a lemna a chih sut zek leng i chi hi.

LAISIANGTHOU IN LEMNA A GENTE

1. Lemna a khiatna:

a) Hebrew pau in “SHALOM” (Lemna) huai tuh kidouna hiam, kisiatna om lou chihna a hi. Shalom thumal shalam a pan lakkhiak ahi a, lungsim dam, taksa dam/neih-leh-lam bitna chihna in kizang a, tua ban ah, bukimna, dimkiihkeihna chihte gen ahi.

Shalom kichi Laisiangthou in a gendan tuh, sunglam ngaihtuahna bukimna/kipumkhatna genna ahi. Kidouna omlou genna hithou sam mah leh a tamzaw in sunglam ngaihtuahna bukimna leh lungsim ngaihtuahna a kipumkhatna genna lam ahi.

Israelten kimuakna (i.e Zingpha hiam mangpha) in shalom zang ua, huai tuh, “damna leh hauhsakna na tung ah hong tungta hen,” chihna ahi. Huaiziak in, Shalom kichi: i) Lawmta kimuakna, ii) Melmate toh kilemna, iii) Sunglam ngaihtuahna a kilemna chihte genna ahi

b) Greek in “EIRENE” a hi a, Eiro apan kilakhia, huai tuh - kizawmsak ahihkei leh a kitamkhamsa belhkip khawm nawn, a kikhensa kigawmkhawm nawn chih genna ahi. Hiai Greek thumal apan in sapte’n serene chih hon zang ua, huai tuh, huihpi - vuahpi apan bitna, buaina apan bitna leh dai sipsip chih genna ahi. Eirene (Lemna) in hon theihsak tuh, a kikhenzaksa hon belhkhawm nawn hiam hon gawmkhawm nawn a, khat hon suah chihna ahi.

2. I Toupa Jesu hong pianna in Pathian toh hon kilemsak hi. … Lemna leng hen! Hiai mun a leng eirene chih kizang hi. Bangziak a i Toupa Jesu hong pianna a lemna thu hong kipuangkhia hiam i chih leh ei mihingte khelhna ziak in Pathian toh kizopna kitat leh Amah toh kikhensa i hi ua (cf Rom 5:12), hotdam i hih ma un eite Pathian melmate i hi uhi (cf Rom 5:10). A kipah huai mahmah tuh, Amah toh i kimelmakna uh hon kilempihta hi. “Huchi in, ginna a siamtansaka om i hih nungsang, i Toupa Jesu Khrist ziak in Pathian toh i kilemta hi,” (Rom 5:1PEP). Huaiziak in, Pathian leh mihingte a kiphelkhapsa Toupa Jesu Khrist ziak in hon belhkip thak nawn i hita uhi. A kikhensate kigawm nawn in, kipumkhatna hon pia a, sunglam bukimna leh lungmuanna leh lemna hon pia ahihman in, Toupa min i phat hi.

3. I mihinpihte toh kilemna… leitung mihingte lak ah, lemna leng hen! Lemna kichi ei Khristiante kia hilou in, leitung ah mihing tengteng a poimoh mahmah khat ahi. Ei khristiante a ding a poimoh sem hi. I Laisiangthou in, “Nou lam pana hih theih ahih liai leh, mi khempeuh toh kilem un,” chi hi (Rom 12:18BI).

I Laisiangthou changtel ah lemna kiphuangkhia pen in, a selam thil a piankhiak chiang nangawn inleng, sunglam (lungsim, ngaihtuahna) tawldamtak leh lungmuangtak a om theihna a gen hi. Himahleh tua hih i pianpih himawk lou in, Kha Siangthou thilhihtheihna lamdang tak a pan a i neih theih ahi. I Toupa Jesun, “Khamuanna ka hon nutsiat ahi, kei khamuanna ka hon pia hi; khawvel piak bang in ka hon pe kei hi...” chi (Johan 14:27PEP). (Hiai a khamuanna kichi “eirene” thumal mah kizang hi.) Sawltak Paul in, kha gah a genna ah leng “lemna” chih na gen kha hi (Gal. 5:22). “Gilou paisan inla, thil hoih hih in; lemna zong inla, a delh in delh in” (Sam 34:14BSI). “…Lemna zong henla, a delh in delh hen” (1Peter 3:11PEP). Midang toh kilem tak a om theihna dia eiten leng i theihtawp suah ding ahi. “…lungsim mun khat pu in om unla, kilemtak in om un. Itna leh lemna Pathian in noute hon ompih hen aw,” (2Kor 13:11PEP). “…Noute khat-le-khat kilemtak in om un,” (1Thes 5:13PEP). “Mi tengteng toh kilemna leh sianthouna delh un, huailou in kuama’n Toupa a mu kei ding hi,” (Heb 12:14PEP). I biak Pa Pathian in eite khat-le-khat kilem tak a om ding in hon deih hi.

THUKHITNA

Van mite lasak bang in, “…Leitung a a kipahpih mahmah mihingte lak ah lemthu leng hen” (Luk 2:14BSI) a chih bang un, tukum i Toupa Jesu pian champha i zatna uah, eimah mimal leh i innkuante ading in shalom - lungsim dam, taksa dam leh neih-le-lam bitna hong hi henla. Kuapeuh ading in sunglam ngaihtuahna damna kipumkhatna leh lemna hong hi henla.

Eirene (lemna) thumal in a gen bang in - kizawm khawm thak in a kitamkhamsa belhkip khawm nawn in, a kikhensate kigawmna thak hong hi henla. I mi nam leh saptuam sung ah kilemna leh muanna hon tun ta hen aw. Laisiangthou in, “…Khrist khamuanna in na lungtang uah vaihawm hen…” a chih bang in (Kol 3:15BSI).

Huai ziak in, Pathian pomtak biakpiakna i piak theihna ding in, ama’ angvan leitung mihingte lak ah, lemna leng hen! chih a hih dungzui in, i unau, i innsung, i saptuam sung, khosung-vengsung, leh gam leh nam sung a lemna lengsaktu hi thei chiat ding in Toupa’n hon vualzawl hen aw! Amen.

Eite Lak Ah Lemna Lengsak Ni!