Johan 3:16

Khristmas hun a hong tun chiang in mite’n Bethlehem, Suahlam Aksi, Belamchingte, Tanchin hoih puaktu Angelte, Biakinn leh Inn chei di, thilpiak (gift), sum dawngmite’n punna di leh alop ding kia ngaihtuah khathei sek uhi. Akhen inlah Lemna Kumpipa koi a om ahia? a chi uhi. Khristmas thupuak diktak zaw hiai teng sang in a thupi in a thukzaw tham hi. Mihing ngaihtuahna leh dotnate dawnna ahi. A thupuak zaw kilemna, khamuanna Tanchin hoih ahi. Hiai in thil poimoh mahmah thum a tunkha a, tuate A pianna, A sihna leh A thupina tunna ahi.

A pianna: Khristmas masapen zan in Angel in Belampu thawmhau takte kiang ah, “Lau kei unla ngai un, michih ading in Tanchin hoih kipahhuai mahmah kon tut ahi...Hondampa a piangta, Amah Khrist Toupa ahi” chi hi. Luka 2:10-11. Hiai Tanchin hoih bang ahi ding?” Amah a hong ki-awngsak a, sikha bang in a hong om a, mihing bang a bawl in a hong om hi” (Phil 2:7). “Thu sa a hong suak a, i lak uah a hong teng hi, hehpihna leh thutak a dim in; a thupina Pa Tapa tang neihsun thupina bangbang i muta hi”. (Johan 1:14)

Kum 2000 val paita a gan an piakna kuang a sial naungek khovel ah nang ading in piak a hong hita hi. Na neikha ta hia? Hiai kia hilou in Innkuan, khotang leh gamsung kikhekna thupitak a na tunta hi. Eilak mahmah leng a hoihlam a kikhekna thupitak hontun leh i chi mahmah hi.

A sihna : Khristmas thupuak diktak theihna/neihna din a sihna maihtheih ahi kei hi. Angel in Jesu pianna ah “...Aman a mite a khelhna ua pan a hondam ding...” a chi hi. Mt 1:23. “Khrist Jesu khialte hondam ding in khovel ah hong ...” 1Tim. 1:15. Khelhnate ngaihdamna din zaw Jesu Khrist sisan Khros a hong luangkhia kia ahi. “... hiai ka sisan, khelhnate ngaihdamna ding a mi tampi dia pawt ding, thukhun tuh ahi” a chi hi. Mat. 26:28. Sisan in hinna a pia chih ahi. “Sa hinna pen sisan a om... Na hinna dia kilemna bawlna pen sisan mah ahi” Lev 17:11. Khrist Belamnou sisan tuh khovel khelhna ngaihdamna dia a kingakna ahi. “En un, Pathian Belamnou khovel khelhna lamangpa” Jn 1:29. “Hiai ahi tui leh sisan a hong paipa Jesu Khrist” 1Jn. 5:6.

Eite kingainiam a, i khelhnate leh chitlouhnate kipulak a, Amah lam i naih ding ahi. “Pathian kei mikhial ka tung ah zahngai in” i chih ding ahi. Lk 18:13b. “Pathian deihlam kithoihnate zaw ka khasia ahi. Pathian aw, lungtang khasia leh kisik tuntun na musit kei ding hi” Sam 51:17.

Hiai ahi Khristmas thupuak, khovel in salam, khalam, lungsim leh ngaihtuahna in a na lunggulh pen ahi. Himahleh a khente’n chiamnuih bawlna leh haihuai a nasa uhi. “Kros thu zaw mangthang lelte adin haina... ei hotdam lellelte adin bel Pathian thilhihtheihna ahi zaw hi” 1Kor 1:8.

I khotang ah kikhekna (reform) a poimoh chih i theichiat a, hiai din tupna hoihtak toh lungtang kisikna diktak i neih poimoh ahi. Huai tuh sunggiltak a kisikna leh kikhekna ahi. Jesu’n ana genna ah “Na pianthak ngeingei ding ahi...” a chi hi. Johan 3:7. Huaiziak in, “na kisikkei uhleh ... na mangthang vek ding uh” a chi hi. Luka 13:5. “Pathian... tun ah zaw gam chih a mi tengteng kisik ding thu a peta hi, ni a chiam ziak in... khovel vaihawm ding... miteng kiang ah a theisakta hi”. Nas. 17:3.30-31. Kua ahia kisik ding? Mi tengteng. Jesu Khrist in Kros a sihna in a hon sapna hiai ahi Khristmas thupuak zaw mawltak a gen in na kisikkei leh na mangthang ding chih ahi. Nang kisik in amah kianglam na zuanta hia? Hun om lai.

Thupina: “Pathian sa a muhtheih a latsak in a om a, Kha a siamtan sak, Angelte muh, namte lak a tangkoupih, khovel a mite gintak, thupina a pitouh ahi.” 1Tim 3:16. Khristmas thupuak a pianna leh a sihna a bei mailou in mihing khangthu a poimoh mahmah, Pathian Kumpigam ah vualzohna thupitak toh a hon tunding a hi zaw hi. “I pumpi thulimlou amah thupina pumpi toh kibang in, a hon bawlsak ding a…” Phil.3:21. Hiai hun chiang in Bethlehem gan an piakna kuang a sial naungek tuh kumpite Kumpi leh toupate Toupa a hong hita ding hi. A pian in gan anpiakna kuang ah sial in om a, a sih in Linglukhu khuksak in a om hi. Himahleh a hong painawn chiang in Van sepaihte heutu lianpen a hong hita ding hi.

Hiai hun chiang in Aman khovel kidouna, buaina, mangbatna ah vai a hawm dia, huchi in Pathian Kumpigam tunding ahi dia kipahna, lungmuanna tawp neilou, khotang vaihawm ah kituahna leh ki-itna, khelhnate hih beina, natna a om nawn kei dia, sihna lakmang ahita ding hi. Amah Jesu Khrist vang in ahi “Ngai in, Pathian biakbuk mihingte lak ah a omta hi, amau lak ah a teng dia amau a mite ahi ding ua, Pathian mahmah in amau a ompih dia a Pathian uh a hi ding hi. Huan a mitte ua kipan in khitui tengteng a nulhul dia; sihna a om nawn kei ding hi” Kil 21:3-4.

Hiai ahi Khristmas thupuak Tanchin hoih, i lametna, Khristmas Aksi mialnuai apan vakna hon tun, nithak hong tung ding khamuanna, nop kiam theih louhna, thupina leh vualzohna thupitak a thop a i omna ding, Amah naungek hong piang Khrist Jesu (Messiah) vang in ahi. Amah “A min Lamdang, Lemthei, Pathian Hat, Tangtawnpa, Lemna lal ahi” Isai 9:6. Halleluiah!! Hong piangpha nawn ve nang ka tangtawn lal ding in, chithei chiat din Toupa’n Khristmas tungtawn in hon vualzawl chiat hen!