“Pathian Pomtak Biakna” chih thupi zang in khateng khennenna pansan in kumkhat sung ving veng pulpit sermon i piakte ban ah i gelhthohte kum hong bei toh kituak a zouding i hi ta a, kuapeuh in phattuampih ding in i kilamen hi. Ahihhang in Khristianna zaw a thu vuak a zak leh theih hilou, hin-a-hinkhiakpih (practical) ahihman in a phattuampih taktak dingte tuh ana zuihthoh (practise)te hiding hi. I thupi lakkhiakna hoihtak a i et chiang in Pathian lungtuak leh pomtak Biakna kichi Biakin sung a thilhihte kia hilou in tuate sang mah in i niteng hinkhua leh nasep lamsang kawkzaw hi’n a muhtheih hi.

I. BIAKNA KICHI BANG AHIA? (Zahna piakna ahi chih i thei chiat) Thilsiamte, Laisiangthou leh Laate tungtawn in Pathian theihdan leh muhdan i nei chiat a, Pathian in a deih leh huat leng i thei. Hiai ahi- Pathian mihingte laka hong kilakna. Pathian kilakna mu a thei miten bangchi bang hiam bek in dawngthuk teitei uhi. Hiai kilakna DAWNTHUKNA tuh BIAKNA ahi. Bangchi bang in na dawngthuk a? Pomtak hia pomtak lou chih thu poimohtak ahi.

1. Abel in Pathian kilakna dawnkikna in a hoihpen leh thaupen a pia a, hiai tuh Abel biakna ahi. Pathian in a pomsak lai in Kaina in hih maimai, tomkhawm zok maimai in Pathian a bia a, Tualthahna tung hi (Gen.4:4).

2. Abraham in Pathian kilakna theichian law mahmah ahih ziak in a penpen, teknung-tapa neihsun pia in Pathian a bia hi (Gen.22:10).

3. Noah in kilakna dawnkikna in Pathian a masapen in a koih gige a, maitam a masak gige hi (Gen.8:20). Hiai tuh Noah biakna ahi. Pathian toh tonkhawm hihna ngah in Lamzanna ngah hi.

4. Serafte’n Toupa a siangthouna toh mangtutphah sangtak a tawisan a om “Sepaihte Toupa a siangthou hi, a siangthou hi” chi in zahna toh Pathian a bia ua, a mai uh leh khete uh nangawn dawksak ngamlou in a khate (wings) ua sel thimthem in pahtawina husa a suah uhi (Is.6:1-3). Toupa tawisang in om hi.

5. Jawlnei Isai in Toupa kilakna mu in, niin leh buah ahihdan kimu in khelh kipuanna toh dawngthuk in moh siansakna ngah, “hiah ka om hon sawl in” chi in Pathian adia kimansa hihna toh a bia hi (Is.6:5,7).

6. Pathian Adam kiang ah kilak a, Adam chi a a sap lai in Adam in a dawnkikna tuh ana kibuksan chih ahi (Gen.3:9). Toupa apan Sapna mu hinapi a kibuksan i hi kha hiam? Hamsiatna in zui ahi.

7. Akan in Pathian kilakna, Pathian deih leh deihlouh thei na piin simtatna toh dawngkik ahihman in Israel nam in zahlakna tuak in amah mah in sihloh hi (Josh.7:1,25). Mimal leh Nam ading in pukna leh vuallelhna-khelhna ahi.

8. Anania leh Saphira in Pathian kilakna, simtatna/nekgukna toh dawngkik in kilim neihna toh bia ahihman un sihloh uhi (Nas.5:1-10). Kilim neihna leh simtatna in i inkuan ahih chimit khak ding veng ni.

Unau, Pathian kilakna bangchi bang in na dawngkik a? Bangchi bang in Pathian na bia a? Na mimal, inkuan leh saptuam ading in hamphatna tuntu ahidiam? Pathian ading in pomtak ahidiam?

II. BANGCHI BIAK DING? Romete 12:1-2 ah gingtuten Pathian i biak dingdan hon sinsak hi. Nidang in Grikte’n pilna in khovel a zou ua, a philosophy uh khat, ‘All material/matter is evil and nothing good lives in it’ ana chi uhi. Amaute ngaihdan in pumpi tuh sianglou leh buah, zumhuai leh simmoh huaiin a koih uhi. Huaiziak tak in sawltak Paul in Romte kiang a laithon a khakna ah, NA PUMPI UH’ chi in pumpi poimohdan leh zat dingdan gingtute sinsak hi. Tua pumpi zatdan ah Pathian Pomtak Biakna i neihtheih leh neih theihlouh kinga hi. Grikmiten Pumpi a sia mawngmawng ahi a chihlai un Pathian in manphatak in zang nuam hi.

1. Jesu Khrist Sa hongsuak in tua si leh sa in mihingte hongtan a, Pathian in pumpi niallou chihna ahi (vanzat a zang).

2. I Kha (spirit) Pathian a ahih bang in i pumpi leng amah a ahi a, huaiziak in, Pathian temple na hi uh chi hi (I Kor.3:17). Huai Pathian temple hihse mi Pathian in hihse ding chikhop in Pathian in pumpi hum in deih in poimoh hi. Journalist minthang Khuswant Singh in Biakinte susia unla puanzakte botsia un, hileleng Pathian tenna mihing hihsiat khak ding pilvang mahmah un chi hi. Pumpi Pathian’ temple ahi a, Pathian Kha tenna ahih ziak in Pathian hoihna leh deihdan semkhetu leh taklangtu ahih ding, Pathian adia siangthou a zat ding ahi.

3. Thukhun lui a kithoihna ganta gawl-atlup sa, maitam a koih, bangmah semthei nawnlou pumpi hi louin, a langlang a diangthei, semthei, gen thei, a hinglai pumpi mah Pathian mai ah kithoihna / biakna ding in zang un chi hi (Rom.12:1).

A GEN UT TAK BANG AHIA I CHIH LEH

1. Na pumpi ua na sep ding khempeuh uh, na hih peuhmah uh Pathian adia kithoihna hing, biakna hing, pomtak ahihding ahi chihna ahi. Hiai in niteng a i sep-i bawl, i ngaihtuah, i kizatna, i gen i sak bangteng huamkha ahihziak in i hinkhua tuh biakna hinkhua ahihding genna ahi.

2. Club Hall a ka om chia ka ut-ut sem thei a, ka ut ut ka khoih theih a, biakin sung a tuate khelhna ahihleh Pathian lungtuak kithoihna hing hilou chihna ahi. Sorkal office hiam bazar hiam a ka omdan/gamtatdan saptuam/biakin a khelhna a suahleh Biakna hinkhua ah ka hing khakei chihna ahi.

III. KOIMUN A BIAK DING:

Jesu’n Samari numei kiang ah, hiai taang chit-chiat lou leh Jerusalem khua chitchiat lou ah leng na biak hun uh a tungta hi… huai hun chiang in Pathian be taktakten kha leh thutak a Pa be ding uh ahi, Pa’n huchibang mi a bemi ding in a zong hi chi hi (Jn.4:21-23). Hiai apat in Biakin a biakkhawmna kia hilou in koimun peuh leh koilai peuh ah i gamtat/sep-le-bawl teng tuh biakna nasep, biakna hinkhua ahih ding chihna ahi. Kithoihna hing, siangthou leh Pathian lungtuak ding in na sapum uh lan ding in kahon ngen hi chih ahi. Huchi ahihleh, Gingtuten Pathian bedia office kai ding, dawr ngak ding, loukuan ding, thalou kuan ding, committee ding, Pathian bedia jugali/mistry nna semding, school kai ding, khualzin ding i chih theih ngai hilou hiam? Hiai ahi i biaknadan ding Paul in a gen. Huchibang hihthei ding in ‘na lungsim uh a thak a om in hong lamdang zawta un’ chi hi.

IV. KIVELTHAKNA DINGTE:

1. Biakkhawmna ah: Toupa’n a mite lungsim munkhat leh kipumkhat tak a biakkhawm, a pahtak lam ahi. Jesu’n a thumna ah a nungjuite din kipumkhatna ngen tuantuan hi. Kipumkhatna a poimohdan sawltak Paul in a laikhakte ah poimoh gen mahmah hi. Biakkhawmna tuh a mite’ kipumkhatna taklatna khat ahih ziak in Toupa’n thupina tang in mimal biakna sang mah in Amah tawisang in om a, a pahtak lam ahi. Thathou tak in biakkhawmna ah na kihel hia?

2. Bible sim ah: Tulai khristiante’n i taksap pen Pathian aw ngaihkhiak a Laisiangthou sim ahi. Laisiangthou in mimawl pilsak, hinna halhsak, mitte hih navak, dangkaeng sanga deihhuai zaw khuaizu sang a khumzaw ahihleh bang a chia limsaklou i hia? I khete adia khawnvak, i lampi adia vakna ahihleh bang a chia hun pe zoulou i hia? Laisiangthou ah kiknawn ni.

3. Thumna ah: Paul in saptuamte a thumsak chiang in a salam damtheihna ding uh leh a khosakna dingte uh sangmah in a khalam ua ding in thumsak zaw hi. Eimah leng i thum chiang in salam ading kia ngenngen mai gingtu hihna apan khalam khanna leh Toupa min thupina ding in thumni. I nget teng Toupa’n honpia hitazen leh khouhlou a khuppuk di hihang.

4. Nu-le-pa, ta hihna ah: Mohpuakna i sepkhiakna ah Toupa’ ngaih in pomtak mah ahi diam? Pomtak biakna ahi diam?

5. Khotang adia kizatna ah: “A thak a om in hong lamdang zaw ta un” chih in bang gen ahia? Kop-le-kai thuah a khosakna leh gamtatna apan kikhek in Toupa adia lungtuah huai in hong kipumkhek un chihna ahi a, ut chia ngou utchia vom ding a Toupa’n hon hotdam hilou i hi. Gingtu kahi chi in Pathian minbang loulou zen napi a utteng gen utteng sem hinkhua apan kikhek ding in Toupa’n hon lamen hi.

6. Nasep leh nekzonna ah: Mite neih bang nei sam leng, mite khosak bang in khosathei sam leng chi a kilawm leh kilawmlou ngaihtuah hetlou a kaihkhawm sawmte hihkhak ding lauhhuai ahi. A langkhat ah nahoih sem a Toupa bia hithou mahleng Toupa’n hon et chiang in kilawmlou tak a i gamtatna in i nasep hoihteng liahmang ahihkhak ding lauhhuai hi. Nektak zonna ah ginomna leh chihtakna suah ni. Toupan saptuam leh khotang/sorkal nna khenlou in ka nungzuite’ sep ding in kilawm hia kilawmlou chih ahi hon bukkakna. Phattuampih ding in Toupa’n hon vualzawl hen!