Romete 12:1-2

Thupatna: Tuailaite’ hun poimohtak Tuailai Day kha i hong tun toh kituak in, simtute i Toupa Jesu Khrist itna masuan in Tuailai Day chibai ka hon buk hi! Tuailai hinkhua a Pathian pomtak biakna kichi thupi poimohtak ahi. Himahleh biakna i chih subject liantak ahi a, a bukim in i genzou kei ding hi. Bangteng hileh, Bible’ hon sinsak biakna bang hihiam chihleh pomtak biakna hinkhua bangchi neih ding, chih thute, hihtheih bang in enkhawm le’ng i chi hi.

I. BIAKNA BANG AHIA?

Erasmus in, hilhchetna khempeuh lauhuai ahi, ana chih bang deuh in, biakna tuh thuvual khat a genchet vual ahikei. Thiltuah (experience) ahi a, a thuklut zousemte’n muhsuah tamsem nei uhi. Tua bang a suisenglouh ahih kawmkawm in, a gen bang hihiam, chih Laisiangthou tungtawn in muhtheih hi. Biakna thumal kizang khenkhatte hiaite ahi uh:

1. Zahna/pahtawina piak dia phu (weorthscipe - “worth” and “ship”) - Rev. 5: 12– 14
2. Kunsuk, khukdin, bokkhup (shachah, hebru) - Exod. 4:31
3. Kunsuk, bokkhup, zahna toh a khut tawp (proskuneo, greek) - Jn. 4:24
4. Nasepna – ministry/service (leitourgia; Siampi’ nasepna - cf. Lk. 1: 23; Heb. 9: 21); Khrist nasepna (Heb. 8: 6), saptuam’ biakna (Nas. 13: 2) gen thumal ahi. Ginna leh thumanna toh gingtute’n Pathian nna i sepna.
5. Kizopna – loubawltu leh a haichi, a gante toh kikal (colere, Latin)

Hiai thumalte i lakkhawm chiang in, biakna ah lungput (zahna, ngaihsanna, kihtakna, thupi ngaihna), nnasep gamtat (kuun, bokkhup, nasem) leh kizopnate (betu leh biak a ompen) a genkha vek hi.

II. BIAKNA HINKHUA

Ahihleh, LST a biakna genna a kizang thumalte pansan in, biakna in a gen/kawkte i sui a, tuailaite’n tuabang in Pathian i bekha na hiam? I hinkhua in genkha na hiam? I kivel uh a poimoh hi.

A. Biakna tuh Pathian toh kizopna hinkhua ahi:
Betu leh biak a om kizopna. Bangchik in, bang hun ah Pathian toh mimaltak in na kizomta a? Hiai bang na hinkhua a tung ngei nailou ahihleh, na biakna nnasep leh na kizatna khempeuh a thawn hilai ding hi. Nei na hihleh na kizopna uh akhang in a hoih hia? Tuailai Joseph, Daniel leh a lawmte’ biakna hinkhua na experience zelzel hiam? Pathian theiloute’ gamah zong, Pathian toh a kizopna/kithuahna uh a tan ngeikei hi. Ei tuailaite, biakin kong i pusuah leh Pathian toh kizopna bei geih zel abang hi!

B. Biakna tuh Pathian toh kisuktuahna (Encounter) hinkhua ahi:
Betu’ kihonna, kipiakna leh biak a om Pathian’ kihilna/kilakna kisuktuahna leh kithuahna ahi. Pathian na biakna hinkhua ah, a kilakna leh houpihna thak na zazel hia? A Thutak leh A Kha’ pawlna thak nisim in na ngah na hiam? Laphuaktu’n, “sunchin ama’ sang in a hong ngaihhuai semsem ahi” chih experience na nei zelzel hiam? Hiai bang experience neite’n Toupa ngai semsem ua, a siangthouna leh thupina a chian semsem ua, Toupa kihta semsem uhi.

C. Biakna tuh Pathian piakkhiakna hinkhua ahi:
Eimah (total self) piakkhiakna ahi, i gen. Toupa tuh i bangkim piak ding a phu omsun ahi. Biakna ah, Pathian in ei adia banghiam hon hihsak ding ngaihsutna a masa kha sek hi. Ama’n bangkim hon peta a, hon pelellel a, hon pelai ding hi. Nang na bangkim na pia hia, chihthu ahi. Tuailai Abel biakna na experience ta hiam? (Gen. 4:1-5; Heb. 11:14; I Jn. 3:12). Tuailai Isak leh a pa Abraham’ biakna na experience zelzel hiam? (Gen. 22:1-19). Hiai mite tuh ginna a amau mahmah kipesiang masate ahi uh. Tua ziak in a biakna uh diktat in pomtak ahi.

D. Biakna tuh Pathian’ thumanna leh nasepna hinkhua ahi:
Thumanglou Kumpi Saul’ biakna thillat san in a omkei. A thillat kia hilou, amah nangawn paihkhiak ahi. “Belam leh bawng hoihpente leh thaupente” eive Saul thillat dek. Pathian thu zuiloupi’n, thilpiak ah petampen award bang sang leng zong, Toupa’ santak hituanlou hi. Kaina’ biakna bangziak a san a omlou? Amah santaklouh ahih ziak ahi. “Amah” leh a thillat a chisese; A lungput diklou khin, thumanna, zahna neilou khin hi (Gen. 4:5f)

E. Biakna tuh hinkhua pumlum sukha biakna hinkhua ahi:
Programme/event ahi kei a, hinkhua ahi. Nang toh Pathian’ kal (kuamah theihpihlouh) kizopna hinkhua ahi. Pathian leh na innkuan mite (hon thei thukpen) toh na kizopna hinkhua ahi. A tawpna ah, Pathian mai a saptuam sung, khotang leh mipi lak a na hinkhua ahi. Khenkhatte a tawpna pen a kideek hamham, kisum hamham, a uniform silh hamham i hikha hiam? Na mimal hinkhua bang a chi a? Na innkuante’n Pathian laumi in hon thei uhia?

III. NISIM A PATHIAN’ POMTAK BIAKNA HINKHUA NEIHTHEIHNA
A tung a i gente toh kisai in, kuama’n, tua dan in pomtak biakna hinkhua ka nei gige, i chihngam ka gingta kei hi. Ahihleh, thilhithei lou Pathian in hon ngiat maw? Eimah hatna a tuh “hitheilou” hi. Himahleh, Pathian’ zahngaihna ziak leh A Kha pina toh hithei hi (Zek. 4:6; Rome 8:1-17). Huaiziak in, tu kum i thupi bulphuhna Rome 12:1-2 pansan in, nisim hinkhua a Pathian pomtak biakna i neihtheih dingdan kikum laileng i chi hi.

A. Jesu Khrist a Pathian’ zahngaihna mangngilh ngeike’n (t.1a):
Paul in, Rome gingtute’ kiang ah, khalam biakna hing a neihgige theihna ding un, Pathian’ zahngaihna mangngilh ngeilou ding in hasuan hi. Toupa’ zahngaihna ziak lel a hing, ngaihdam leh hotdam a om i hihdan mangngilh ngeikei le’ng, i biakna lungput dik gige ding hi. Toupa’ zahngaihna nnasep Jesu Khrist a i donte Rome 1-11 sut le’ng tampi i mu ding – diktansakna (5:1); hotdamna (5:9-11); tangtawn hinna (5:12-21); Kha Siangthou a zohna (8:1-17); Tunung lametna, thupina leh tangtawn a bitna (8:18-39). Hiai thute’n pomtak biakna hunteng a nei dia hon motivate ding ahi. Pathian zahngaihna theilou in, pomtak biakna kongpi kihong ngeilou ding hi.

B. Na pumpi kithoihna hing leh siangthou hidi’n lan in (t.b):
Lagelhtu minthang, Isaac Watts in, “Leitung pumpi kei a hi leh, Pathian piak di’n ka hawmthoh lai; Tuabang Pathian’ itna manpha, ka kha, hinna, bangkim a man” na chi hi. Pathian’ itna leh zahngaihna dawnna thilhih dia kilawmpen tuh i pumpi a i kipiak louhngal, akilawm zaw dang (reasonable service) omlou hi. Huaiziak in, i pumpi uh kithoihna hing hidia i lat ding ahi. Paul in, hiai ah thukhunlui kithoihna toh tehkak hi. Siampu in gan sisa maitam ah a lan a, ei gingtute’ biakna/kithoihna bel, a hinglai i hinna pumpi lat ding ahita. Hiai kithoihna tuh -

1) Hunteng leh munteng a kithoihna (constant sacrifice).
2) A maitam tuh i pumpi omna mun khempeuh.
3) A thillat tuh ei (total self) i hi.
4) Siangthou leh pomtak hi gige di’n (Heb. 12:4; Rom. 6:13).

Ei tuailaite’n i pumpite uh koi/bang ah i lan a?

1) Nek-le-dawn, thilchiin hoihlou adi’n?
2) Thanghuaina, khovel nopsakna leh damsung thupina zonna in?
3) I ngaihzawng hon it taktak loute’ adin?
4) A langtang a setan biakna di’n?
5) Ahih keileh, Toupa adi’n?

C. Pathian’ deihbang (pomtak) kikhekna nei in (t.2)
Hiai ah kikhekna chi nih a gen a, pawlam akipan kikhekna leh sunglam akipan kikhekna. Hiai kikhekna chinihte a omsaktu tuh, “biakna” ahi. Biakna tuh a hon kheklamdang thiltuah (transforming experience) ahihman in, na biak penpen na bang deuhdeuh ding hi.

1. Pathian’ deihlouh kikhekna: Hiai tuh pawlam apan kikhekna ahi (to conform, fashion, metaschematizomai). Khovel paidan/sinsak in a thuzoh bang a paina, kibawllemna, pawlam kicheina gen ahi. A chiangzaw in, khovel vaihawmtu Setan biakna ahi. A langtang a setan biakna i pawna mahmah a, himahleh khovel mitna leh thuzoh a omna leng setan biakna ahi, chih phawk leng i deih hi. Tulai tuailaite bangziak a khovel sinsakna leh philosophy tuamtuamte’n hichitel a hon zou ahia? Hiai tuh zankhat thu akipan ahikei a, biakna hinkhua (Bible sim/sut, thumna neih etc.) awl-awl a taisan a, khovel hindan a awl-awl a kitahlutna ziak a piang ahi. Khovel thuzoh a omna tuh:
a) Setan thunuai a lutkikna, biakna ahi (I Pet. 1:14; Eph. 2:2)
b) Pathian melma suahna ahi (Jak. 4:4)
c) Pathian itlouhna leh manthatna ahi (2 Jn. 2:15-16; I Kor. 7:31)

2. Pathian’ deihbang kikhekna: Hiai tuh sunglam a pan kikhekna (to transform, metamorphoumai) ahi. Pathian Kha thilhihtheihna toh sunglam akipan Jesu Khrist batna a kikhekna ahi. Daniel leh a lawmte bang a khovel tuiluandan toh kilehbulh (against the current) a chituam ngamna ahi. Hiai bang Pathian pomtak hinna kikhek a omtheihna ding in-
a) Na lungsim (mind) Toupa pia in: Pathian pomtak hinkho dik (balanced Christian life) i zattheihna ding in lungsimthaksakna (renewed mind) poimoh hi. Tua pen ei’ hih ding a chikei a, i lungsim Toupa i piak chiang a Ama’n hon thaksak hizaw hi. Huchi’n lungsim thak toh Toupa’ deihna theihtheihna (discerning mind) i nei ding. I lungsim piakna in a huam –

Amah itpen a nei dia panlak gigena (Lk.10:27);
Lungsim Khrist thumang dia thuzohna (2Kor. 10:4-5).
Sa’ deihdan taisan a, Kha’ a hinna (Rom 8:5-6).
Vanlam thilte a lungsim koihna (Kol. 3:2).
Khrist’ lungput bang neihna (Phil. 2:5; Eph. 4:23).
A hoih peuhmah ngaihsutna (Phil. 4:8).

b) Na deihtelna (will) Toupa’ deihna ah pekhia in: Toupa’ deihna nang deihtelna sang a hoihzaw ahi chih muangngam inla nang deihtelna Amah pengam in. Hiai tuh biakna taktak, pomtak biakna kipatna dia poimoh ahi a, aloutheilou ahi. Aziakbel –

Ka lungsim in ka pumpi thuzoh (control) ahihman in
Ka deihtelna in ka lungsim thuzoh ahihman in
Khristian hinkhua phawkna (feeling) hilou, deihtelna in a pii ahihman in
Khristian itna feeling himasa lou, deihtelna’ nasep (action of the will) ahihman in.
Huaiziak in, i deihtelna khempeuh Toupa’ deihna nuai a i piakkhiak chiang in, Aman ei ading a hoihpen a deihna hon theisak hi. Getsmani ah i Toupa’n Pa’ deihna ngen in thumvei a thum hi. Hiai in Toupa’ deihna chi thum (hoih, hoihzaw, hoihpen) pha chi ut hilou in, Toupa’ deihna (God’s will) ei deihtelna hoihpen tunglam pek a hoihzaw gige (hoihbukim, always perfect) ahihdan hon sinsak ut hizaw hi. Hiai bangchi theih ding? By experience in, na thei ding. Hiai ahi pomtak biakna gah.

Lucifer in na zangkhial in, Adam leh Evi in zong na zangkhial uh. Himahleh i Toupa’n a vanmun thupi ah leng a zangdik a (Phil. 2:5-8), Getsmani huan ah leng a zangdik a, tua ziak in, Pathian’ tangtawn thangpaihna thoihdam in, a lungkimna kithoihna hing hon latsak hi. Halleluiah! Hiai ahi, Pathian’ pomtak biakna i neihna ding a i etton ding.

Thukhupna:
Ka tuailaipih, pomtaklouh biakna ziak a siatna leh buaina lak ah na omlai in, Pathian in Amah pomtak biakna tungding ding in nang mimal hon sam hi. Sapna manpha ahih kawm in, sapna nanung ahih khak ding lauhuai hi. Nang mimal biakna in na innkuan, na saptuam leh minam ah kikhekna a tut ding Toupa’ hon sapna ahi. Tua ding in, na hinna pumpi, lungsim leh deihtelna Toupa’ deihna nuai ah lankhe tawntung in. Toupa’n hon vualzawl hen!