“Aw tangval, na tuailaiin kipak in: na tuailai nite ah na lungtang in hon kipak sak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmna a hon pi ding ahi chih thei in.” Eccl. 11:9

Amasa in hongpai nawn pah ding i Toupa leh Hondampa Jesu Khrist min in munchih mualchih a om Khrist a unaute Itna khut taklam hon len in Khrist Itna toh Chibai ka hon buk masa hi. Tukha thupi ah ‘Tuailai hinkhua a Pathian Pomtak Biak Piakna’ leh Tuailaite ading a ni poimohtak ‘TUAILAI NI’ zang ding a i kisak lai in niteng a i sukkhak leh thilmuh leh theihte tungtawn in i tuailai hinkhua in Pathian ading in Pomtak i hi na hiam kivel chian thak leng ut huai mahmah hi. Tulai khovel ah khantouhna leh khawl vanzat khangtou mahmah in mihing abik in tuailaite lak hon hetkha mahmah in mi amah utdan leh deih dan a hinna, bangmah poisak louhna leh thutak a kibulphuhlou in khovel tui kihawt toh luang khawm a hinkhua zat utna khovel ahih toh kitawn in a diak a ei hon hetkha leh i buaina tangpite uh hiai ah saulou in kikum leng chi’n i taklang hi.

I. Social Media kichi bang ahia?

Social media i chih internet (e.g.:- facebook, whatsapp, twitter, etc) tungtawn a khotang kithuzaktuahna genna ahi. Athumal in a kawk ahihleh khawllou a (online) pawlam mite toh kithuzaktuahna (share information), ngaihdan kikupna (opinions & promote discussion) leh kizopna bawlna (build relationship) lamdeuh a kawk hi. Social Media kizatdan tangpite ahih leh thuthak leh poimoh suina vanzat (finding information relevant to research) e-mail tungtawn a lai kikhak tuahna (Sending and receiving email), Music, la leh a dangdangte lakna leh ngaihkhiakna (Downloading and listening music and other things) chihte ahi.

II. Social Media in a mihingte a thuzohdan (Impact of Social Media & Technology)

Radio, TV, Computer, Internet, smartphones leh tablets chihte khang ah om tuailaite i hi ua, khang masate sang in Technology ah nakpitak in i hampha uhi. Niteng in hiai vanzatte toh i hun tamzaw i subei zel uhi. I kim leh kiang i et chiang in telephones, computers, cell phones, text messages, email, internet, online banking, online shopping, online education, online books, online gaming, GPS leh adang dangten tuailaite hinkhua a hon thuzoh mahmah hi. Social media in mihingte lungput, omdan leh gamtatdan nakpitak in a khek lamdang hi.

a) Ahoih lam ah (Positive impact):

Social media leh Technology in niteng hinkhua ah kithuzaktuahna a baihlamsak mahmah hi. Kithuzaktuahna lam toh kisai in a hoihlam ah naktak in kikhekna ahon tun hi. Muntuam a om i lawmte, tanaute leh sungkuante ban ah nasepna toh kisai in vanzat phatuam mahmah ahih ban ah ngaihdan khat peuhpeuh zalentak a genkhiak theihna vanzat ahi. Zatdan (format) chituamtuam gelhthoh (text), limlak (picture), aw (audio) leh limchin (video) tungtawn in baihlam taktak in a kithuzak tuah theih hi. Lai poimoh leh adangdangte email tungtawn in second tamlou sung in kithot tuah theih ahi a, lai gelh leh nasep himhim a awlsam in a baihlam sak tuan mahmah ban ah hun leh tha tampi a hon dawn zangkhai hi.

b) Ahoihlou lam ah (Negative Impact):

Thil khatpeuh peuh hoihmahmah i chih lailai in a hoihlouhna lam leng ana om zel hi. Hiai Social media chih in khotang leh mimal hinkhua a hoihlou lam ah nakpitak in ahon khek zou mahmah a, Social networking zatkhelhna ziak in i mimal, innkuan leh khotang ah thil saupi a supoi nuam mahmah hi.

i. Kingaihsiatna (Depression): Technology leh social media zatkhelhna in a sukkhak poipenpen tuh kingaihsiatna ahi. Internet tungtawn a i muhtheih a thil ki-post-te leh i muh tamzawte kingakna taktak lou ahi chih i theih adeih huai mahmah hi. Tua bang et tamluatna in mahni kingaihsiatna leh hoih lam sang in hoihlou lam hon tun tam zaw ahi chih telsuimite (research) muhdan ahi.

ii. Ngeinalou tak a thauluatna (Obeisity): Hiailam toh kisai suitu (Researcher) ten hiai vanzatte toh huntam zatluatna in damtheihna lam leng naktak in a subuai chih a muh suahdan uh ahi. Aziak bel taksa sawizawina omlou a mun khat a tutu a khut, mit leh lungsim lam kia tangkha ahihman in thazawina leh ngeina banglou tak-a thau niahnuahna a tun thei chih ahi.

iii. Khotang gamgi kichian neihlouhna (Lack of Social Boundaries): Internet media ahong om apan in khotang vai ah gamgi kichian neihlouhna ahong hat mahmah hi. Limlak chituamtuam a kilawm leh kilawmlou chih omlou a khahkhiak, theih leh zak teng mahni ngaihdan leh ut teng khahkhiak, leh mi khatpeuh ahihna leh ahihlouhnate zalentak a kikhah khiak sak chihte a hong tam mahmah hi. Hiai bang thilchiin in a hoihlou lam a kimai ngalna leh zalenna diklou hon tun in niteng in siatna kibehlap hulhul mai in muh theih a poi mahmah hi.

III. Khovel khantouhna leh a zuitute(Post-modernism) ahi.

Khovel khantouhna in i Khristianna uh toh kisai abiktak in Tuailaite hinkhua ahon sukha diak hi. Tuabang khantouhna hattak ziak in Thutak theihbuaina ahong om a, “a taktak in thutak kichi omlou ahi, thil tengteng ahun leh amun zil a dikvek/ diklou vek thei ahi” chih ngaihdan ahong hat mahmah hi. Zi leh pasal kineihna ah, pasal leh pasal, numei leh numei, hunchiam nei a kitenna, chihte leh mimal dikna tawisang utna ahong lian mahmah hi. Tuabangte kal ah Khristian Tuailaite’n, Pathian in ahon siamna san leh Amah pomtak leh kipahpih lam bang hihiam chih Laisiangthou pansan a i vel chet uh a kul petmah hi. Khovel khantouhna hat in, khovel paidan kikheng lumlet mah leh Pathian leh a thu kikhek ngeilou ahi.

IV. Lunggulhna hattak beitheilou neihna ahi.

Tanchinhoih ziak in nakpitak in salam ah leh khosakna lam ah dopkang in i om ua, Toupa min i phat uhi. Himahleh nopsak utluatna ziak in Dikloutak in i hih ua, lungkhamna tampi in i kisun pailet tektok uhi. “Hinkhua kei a ahi; Ka lungtang deihlam in ka omding” (It’s my Life; Listen to my heart) i chi ua, himahleh Pathian tellou in kipahna bukim a om tuan kei hi. Numei pasal kal a nopsakna (Sex), zu leh sa leh khamtheih (Drugs) a nopsakna ban ah khovel thupina leh minthanna (Fashion) a nopsakna i zong ua, himahleh tuate’n lungkimna ahon pethei kei uhi. Kumpi Solomon in “Amah hihlungkim mi kiang ah Pathian in pilna leh, theihna leh nuamsakna a pe ngala: himahleh mikhial kiang ah, gimthuakna a pia hi” (Eklijiasti 2:26) ana chi hi. Sawltaklian Paul in Lungkimna toh kithuah Pathian limsakna tuh punna (kipahna/nopsakna/hauhsakna) thupipen ahi a chih ban ah, kei hon hihhatpa (Jesu Khrist) ziak in bangkim ah lungkim a omdan ka theikheta, ana chih tulai khangthakte ading in leng a poimoh mahmah hi.

Thukhitna:

Khovel khantouhna in ahon puaksuahte lak ah khawl vanzat hoih leh changkang taktakte’n Tuailaite nak pitak in ahon nawk khata hi. Nidang a i muh leh khoihkhak batlouh thil tampite tuin i khut a tawi in i zang ta uhi. Tuabang a vanzat hoihtaktak i tawi a i zat lai in i vanzat in ei ahon thuzoh hia ahihkeileh, en i vanzat i thuzoh hia chih ngaihtuah a kul mahmah hi. Mi tamtakte’n a innsung a nulepate leh saptuam leh khotang a heutu leh makaite thusang in akhut ua a tawi uh Mobile a thu kigente (message) i zui zaw kha nak uhi. Zu leh khamtheih addict-te i mohsak mahmah lai in; Internet, facebook chihte leh Whatsapp-te leng addict theih luat ana hi ahi. Tawi kei ni zang kei ni i chi kei a, himahleh i zatdan ah i Khristian hihna suklat poimoh i sa uhi. Hiai i vanzatte tungtawn in melma Diabol in tuailai tamtak khelhna a hon pilut thei ahihman in tuate sal apan i suahtak theihna ding in khovel dan bang a hinglou a mi kipumkhek Pathian pomtak leh lungkimna i hih theihna dia panlak hun law mahmahta hi.

Bangchi bang chouna i tuak in, tuate bang i chi maituah a? chih mimal kidot chiat a poimoh mahmah hi. Pathian hehpihna ziak in pilna, siamna, melhoihna leh hauhsaknate nei in, nakpitak a dopkang in i om uhi. Huchihlai in tuate hon pepa Pathian bang i loh ua chih hunteng a i kivelna ding ua poimoh ahi. Pathian tellou hinkhua kichi a thawn lel leh a mawkna lel ahi. I tung a Pathian a lungkim kei leh mihing kuamah in lungkimna leh kipahna taktak kineitheilou ahi. Khovel khantouhna hat in thupi mah leh a kikheng ngeilou Khrist suangpi kip tung a ding a, khovel in a nawk buailouh Khristian Tuailai Pawl hiding in hanlung chiam thak ni. Saptuam, khotang leh gam leh nam a ding a Khrist mel tangsaktu hiding in Pathian Thutak leh Diktatna mah ah kibulphuh in Kilamtou chiat ni hang. Laisiangthou in “Na tuailai nite in nang honsiampa leng theigige in, ni hoihloute a hongtun ua kumte a hongnai ua, amaute ah kipahna ka neikei, na chih hun a hong tun nailouh lai in” (Eccl. 12:1) a chih bang in.